Alla' i ddim talu fy nyfarniad
Tudalen 10 o 12
Gaiff yr hawlydd gymryd unrhyw gamau eraill yn fy erbyn?
Os nad yw'r hawlydd yn siwr pa fath o orfodaeth i'w ddefnyddio, efallai y bydd gorchymyn i gael gwybodaeth yn help. Ffordd yw hon o gael gwybod am eich incwm a'ch gwariant i'ch helpu i benderfynu beth i'w wneud nesaf. Caiff yr hawlydd wneud cais am orchymyn i gael gwybodaeth unrhyw bryd, hyd yn oed os nad ydych chi ar ei hôl hi gyda'ch taliadau.
Bydd y llys yn dweud wrthych pryd i ddod i'r gwrandawiad. Bydd gofyn i chi ddod ag unrhyw ddogfennau ynghylch eich sefyllfa ariannol gyda chi, megis:
- slipiau cyflog;
- cyfriflenni banc;
- llyfrau rhent neu ad-daliadau morgais;
- gorchmynion llys am arian sydd dal i fod yn ddyledus;
- cytundebau hur bwrcas neu logi eraill;
- llyfrau cynilo mewn cymdeithasau adeiladu, swyddfa'r post neu ymddiriedolaeth;
- biliau sy'n ddyledus gennych; ac
- unrhyw filiau sy'n ddyledus i chi.
Rhaid i chi fynd i'r gwrandawiad. Os na fyddwch chi'n mynd, fe allwch gael eich arestio a'ch anfon i garchar am hyd at ddwy flynedd.
Beth fydd yn digwydd yn y gwrandawiad?
Cynhelir y gwrandawiad mewn sesiwn preifat. Yn gyntaf, gofynnir i chi addo dweud y gwir ('tyngu llw' neu 'gadarnhau'). Yna, bydd un o swyddogion y llys yn gofyn cwestiynau i chi am eich sefyllfa ariannol. Caiff yr hawlydd hefyd fynd i'r gwrandawiad i ofyn cwestiynau i chi.
Am eich bod chi 'dan lw' rhaid i chi roi atebion gwir i bob cwestiwn a ofynnir i chi. Os gallwch chi, rhowch dystiolaeth ysgrifenedig i gefnogi beth a ddywedwch. Efallai y cewch chi'ch anfon i garchar os na ddywedwch chi'r gwir am eich sefyllfa ariannol.